երկուշաբթի, 12 հուլիսի 2004
ՀՀ վարչապետ Անդրանիկ Մարգարյանը շաբաթ երեկոյան այցելել է Արմավիրի մարզ՝ նախորդ օրը մարզում տեղացած կարկուտի, հորդառատ անձրևների և ուժեղ քամիների պատճառած վնասներին տեղում ծանոթանալու նպատակով: Վարչապետը եղել է Փշատավան, Նալբանդյան, Ջանֆիդա, Շենավան և բնական աղետից տուժած մարզի մնացած համայնքներում:
Կիրակի՝ հուլիսի 11-ին, վարչապետի մոտ հրավիրվել է խորհրդակցություն՝ ՀՀ ֆինանսների և էկոնոմիկայի նախարարի, ՀՀ կառավարությանն առընթեր ջրային պետական կոմիտեի նախագահի, Արմավիրի մարզպետի, գյուղփոխօգնության բանկի տնօրենի, համապատասխան նախարարությունների ու գերատեսչությունների պատասխանատուների, մարզի պատգամավորների մասնակցությամբ:
Խորհրդակցության արդյունքում որոշվել է ստեղծել հանձնաժողով՝ բնական աղետի պատճառած վնասների չափերը ճշտելու, դրանց հետևանքները վերացնելու նպատակով առաջարկություններ ներկայացնելու համար: Այն գլխավորելու է ՀՀ գյուղատնտեսության նախարարի տեղակալ Սամվել Գալստյանը: Հանձնարարվել է հանձնաժողովի նախագահին՝ բնական աղետի պատճառած վնասները տեղում ուսումնասիրելու և գնահատելու նպատակով, ստեղծել չորս աշխատանքային խումբ, դրանցում ընդգրկելով ՀՀ գյուղատնտեսության նախարարության, ՀՀ կառավարությանն առընթեր արտակարգ իրավիճակների վարչության, Արմավիրի մարզպետարանի և համայնքների ներկայացուցիչներին, հնգօրյա ժամկետում ամփոփել աշխատանքային խմբերի ուսումնասիրությունների արդյունքները՝ նշելով աղետից տուժած գյուղացիական տնտեսությունների և ընտանիքների թվաքանակը, ցանքատարածությունները՝ ըստ մշակաբույսերի և բերքի կորուստը՝ բնամթերքով ու դրամական արտահայտությամբ: Հանձնարարվել է մեկօրյա ժամկետում ներկայացնել նաև տեղեկատվություն գյուղփոխօգնության բանկի և «ԱՄԿՈՐ» բարեգործական ընկերության կողմից աղետից տուժած համայնքներին տրամադրված վարկերի և դրանց մարման ժամկետների վերաբերյալ:
Համապատասխան հանձնարարականներ են տրվել նաև ՀՀ ֆինանսների և էկոնոմիկայի, գյուղատնտեսության նախարարներին, Արմավիրի մարզպետին:
