երեքշաբթի, 29 հունիսի 2004
Հայաստանի գրողների միության հիմնադրման 70-ամյակի առիթով հոբելյանական հանդիսության մասնակիցներին և հյուրերին շնորհավորել է ՀՀ վարչապետ Անդրանիկ Մարգարյանը: Վարչապետի խոսքում մասնավորապես ասված է.
«Հանդիսության հարգարժան մասնակիցներ և հյուրեր,
շնորհավորում եմ բոլորիդ Հայաստանի գրողների միության հիմնադրման 70-ամյակի կապակցությամբ: Տասնամյակներ շարունակ գրողների միությունը, իր կոչմանը հավատարիմ, կազմակերպել է հանրապետության գրական կյանքը, խրախուսել գրողների ստեղծագործական ջանքերը և նպաստել նրանց սոցիալ-կենցաղային խնդիրների լուծմանը: Հատկապես մեծ է եղել միության դերը խորհրդային տարիներին, երբ բազմակարծության բացակայության պայմաններում, այն դարձել էր ազգային գաղափարների ու արժեքների պաշտպանության, ժողովրդի դարավոր պատմությունը ամեն տեսակի խեղաթյուրումներից զերծ պահելու կարևոր առաքելությունն իրականացնողներից մեկը:
Այսօր, մեր երկրում անկախ պետականության ամրապնդման հետ մեկտեղ, ավելի ու ավելի մեծ հնարավորություններ են ստեղծվում հանրապետության գրական-մշակութային կյանքը բնականոն հունի մեջ դնելու, գրողների ստեղծագործական ներուժը միավորելու և այն ի նպաստ երկրի հետագա ամրապնդմանն ու զարգացմանը ծառայեցնելու:
Չնայած սուղ միջոցներին, մեր պետությունն ու կառավարությունը անում են հնարավորը գրական-մշակութային կյանքի աշխուժացմանն աջակցելու համար: Երկրի տնտեսության, կայունության ամրապնդմանը համընթաց այդ օժանդակությունը, իհարկե, կավելանա: Վստահ եմ, որ համատեղ ուժերով, միասնաբար կկարողանանք տեր կանգնել բազմադարյա մեր գրականության հարուստ ժառանգության պահպանմանը` այդպիով նպաստելով ազգային ավանդույթների ոգով գրական նոր սերունդների դաստիարակմանը:
Հայաստանի գրողների միության կարևոր անելիքներից մեկը Հայրենիքի և Սփյուռքի միջև գրական կամրջի ստեղծումն է, գրական-մշակութային միասնական դաշտի ձևավորումը՝ «Մեկ ազգ, մեկ մշակույթ» կարգախոսը իրապես կյանքի կոչելու նպատակով, քանի որ թե Հայաստանում, թե Սփյուռքում ապրող մեր ժողովրդի երկատված հատվածների հիշողությունը և ապագայի սպասումները պետք է դիտարկվեն միևնույն և համակենտրոն շրջանագծի մեջ: «Մեկ ազգ, մեկ մշակույթ» բանաձևը միայն կարգախոսային բնույթ չունի, այն մտահոգություն է և կենսակերպ, քանի որ ազգային մշակույթի միասնականությունը պայմանավորված է համազգային հիշողությամբ և հոգևոր ընդհանրության առկայությամբ: Պատահական չէ, որ Մայր Հայրենիքում ապրող գրողները իրենց միության 70-ամյակը նշում են սփյուռքահայ իրենց գրչակից եղբայրների հետ:
Մեկ անգամ ևս շնորհավորելով Հայաստանի գրողների միության հիմնադրման 70-ամյակի առթիվ, մաղթում եմ բոլորիդ ստեղծագործական անսպառ եռանդ՝ ի շահ Հայրենիք-Սփյուռք գրական-մշակութային կապերի ամրապնդման, մեր անկախ պետականության հզորացման և ժողովրդի հետագա բարգավաճման»:
