երկուշաբթի, 14 հունիսի 2004
ՀՀ վարչապետ Անդրանիկ Մարգարյանն այսօր ընդունել է Երևանի կոնյակի գործարանի (ԵԿԳ) նախագահ, գլխավոր տնօրեն Պիեռ Լառեչին, որն ավարտում է իր գործունեությունը մեր երկրում: ԵԿԳ նախագահը շնորհակալություն է հայտնել ՀՀ կառավարությանն ու նրա ղեկավարին՝ Հայաստանում իր աշխատանքի ավելի քան հինգ տարիների ընթացքում ցուցաբերած աջակցության և համագործակցության համար: Երևանի կոնյակի գործարանի հաջողությունները համարելով ոչ միայն «Պեռնո Ռիկար խմբի», այլ ամբողջ Հայաստանի հաջողությունները, պարոն Լառեչը դա վերագրել է ինչպես մասնագիտական բարձր պատրաստվածություն ունեցող գործարանի աշխատակիցներին, այնպես էլ վերոհիշյալ համագործակցությանը: ԵԿԳ նախագահը ՀՀ վարչապետին ներկայացրել է գործարանի առաջիկա ծրագրերը, որոնք միտված են ավելացնելու խաղողի մթերման ծավալներն ու ընդլայնելու արտահանման շուկաները:
ՀՀ վարչապետ Անդրանիկ Մարգարյանը բարձր է գնահատել պարոն Լառեչի և նրա գլխավորած Երևանի կոնյակի գործարանի գործունեությունը, նշելով, որ այն զգալիորեն նպաստել է խաղողագործության զարգացմանը, միաժամանակ ապահովելով նոր աշխատատեղեր և կայուն եկամուտ՝ գյուղացիությանը: Ամենակարևորը, ըստ վարչապետի, այդ ամենի հետ մեկտեղ, Երևանի կոնյակի գործարանը իր որակյալ արտադրանքով կարողացել է բարձր պահել հայակական կոնյակի երբեմնի համբավը և ավանդական շուկաներից դուրս ևս հաջողություններ արձանագրել: Անդրանիկ Մարգարյանն աշխատանքային հետագա հաջողություններ է մաղթել Պիեռ Լառեչին և հույս հայտնել, որ նրան փոխարինողը ևս նույնպիսի նվիրվածությամբ կշարունակի ղեկավարել գործարանը:
