երկուշաբթի, 19 մարտի 2001
Այսօր Հայաստանի Հանրապետության կառավարության և դոնոր կազմակերպությունների միջև ստորագրվեց 2001 թվականի մարդահամարի իրականացման աջակցության վերաբերյալ փոխըմբռնման հուշագիր: Հայաստանի Հանրապետության կառավարության անունից հուշագիրը ստորագրեցին ՀՀ տարածքային կառավարման նախարար Հովիկ Աբրահամյանը և Հայաստանի Հանրապետության ազգային վիճակագրական ծառայության նախագահ Ստեփան Մնացականյանը, իսկ դոնոր կազմակերպությունների կողմից՝ ՀՀ-ում ՀԲ-ի ներկայացուցիչ Օուեյս Սաադաթը, ՀՀ-ում Մեծ Բրիտանիայի և Հյուսիսային Իռլանդիայի Միացյալ Թագավորության դեսպան Թ. Իոնսը, ԱՄՆ-ի միջազգային զարգացման գործակալության առաքելության տնօրեն Ք. Սիմոնսը և ՀՀ-ում ՄԱԿ-ի համակարգող Կատիցա Չեկալովիչը:
Դեռևս 2000թ. փետրվարի 19-ի թիվ 78 որոշմամբ՝ «Հայաստանի Հանրապետությունում 2001 թվականի մարդահամար անցկացնելու մասին», կառավարությունը ստեղծել էր մարդահամարի կազմակերպման և անցկացման համապետական հանձնաժողով՝ ՀՀ տարածքային կառավարման նախարարի նախագահությամբ: Միջազգային դոնոր կազմակերպություններն՝ ի դեմս Համաշխարհային բանկի, Մեծ Բրիտանիայի Միջազգային զարգացման գործակալության, Միավորված Ազգերի Կազմակերպության բնակչության հիմնադրամի, Ամերիկայի Միացյալ Նահանգների Միջազգային զարգացման գործակալության, իրենց մտադրությունն էին հայտնել ֆինանսական և տեխնիկական աջակցություն ցուցաբերել 2001 թվականի մարդահամարի իրականացման նպատակով Հայաստանի Հանրապետության կառավարության ռեսուրսները համալրելու համար:
Այդ մտադրությունը վավերացվեց այսօրվա հուշագրի ստորագրումով:
