հինգշաբթի, 27 մայիսի 2004
ՀՀ վարչապետ Անդրանիկ Մարգարյանի շնորհավորական ուղերձը Առաջին հանրապետության օրվա տոնի առթիվ
Սիրելի հայրենակիցներ,
Շնորհավորում եմ Հայաստանի առաջին հանրապետության օրվա առթիվ: 1918թ. մայիսի 28-ին մեր ժողովրդի հավաքական կամքի ու անկոտրում ոգու շնորհիվ իրականություն դարձավ անկախ պետականությունը վերականգնելու հայոց դարավոր իղձը: Մեր ժողովրդի կյանքում նշանակալի մայիսյան հաղթանակների շարքում Սարդարապատի, Բաշ-Ապարանի, Ղարաքիլիսայի հերոսամարտերն առանձնանում են շուրջ վեցհարյուրամյա ընդմիջումից հետո, սեփական ուժերին ապավինելու շնորհիվ, անկախության գաղափարն իրականություն դարձնելու առումով` հետագայում հիմք դառնալով պատմական նոր սխրանքների, հայոց ազատատենչ ոգու նոր դրսևորումների:
Թեև Հայաստանի առաջին հանրապետությունը կարճ կյանք ունեցավ, սակայն նրա դասերը՝ ազատության, անկախության, ինքնիշխան պետություն, հզոր պետականություն կերտելու և որ կարևորն է` պահպանելու հրամայականի մասին, սերնդե-սերունդ փոխանցվեց և իր նոր ու փայլուն դրսևորումն ունեցավ 1980-ական թվականների վերջին: Արցախյան հերոսամարտն ապացուցեց պատմական ձեռքբերումներն այլևս պահպանելու մեր վճռականությունը: 13-ամյա Հայաստանի երրորդ հանրապետությունն այսօր վստահ առաջ է ընթանում` աստիճանաբար զարգացնելով իր տնտեսությունն ու հզորացնելով անկախ պետականությունը, ամրապնդելով իր տեղն ու դերը համաշխարհային գործընթացներում: Ժողովրդավարական արժեքների վրա հիմնված ազատ ու անկախ Հայաստանն այլընտրանք չունի և համոզված եմ, այլևս ոչ մի ուժ, ոչ մի դժվարություն ի զորու չի լինի խոչընդոտել մեր երթը:
Մեկ անգամ ևս շնորհավորում եմ բոլորիս այս գեղեցիկ տոնի՝ Առաջին հանրապետության օրվա առթիվ: Մաղթում եմ քաջառողջություն, ամուր հավատ, դժվարությունները դիմագրավելու կամք ու տոկունություն: Լինենք միասնական, և պատմական հաղթանակները զորավիգ կլինեն ազգային հզոր ու բարգավաճ պետություն կերտելու մեր ջանքերին:
