ուրբաթ, 16 մարտի 2001
Այսօր ՀՀ վարչապետ Անդրանիկ Մարգարյանն ընդունել է Հայաստանում Ֆինլանդիայի դեսպան Տիմո Լահելմային, որն օրերս իր հավատագիրն է հանձնել ՀՀ նախագահին: Վարչապետը շնորհավորել է դեսպանին մեր երկրում դիվանագիտական աշխատանքն սկսելու կապակցությամբ և հույս հայտնել, որ այդ նշանակումով երկու երկրների և ժողովուրդների հարաբերություններն ավելի կսերտանան, նաև Հայաստանի ու Ֆինլանդիայի դեսպանների գործուն մասնակցությամբ երկու երկրների կառավարությունները հաջողությամբ կիրագործեն իրենց առջև դրված ծրագրերը: Վարչապետը հույս է հայտնել, որ բացի երկկողմ հարաբերությունների զարգացումից, Հայաստանը և Ֆինլանդիան սերտորեն կհամագործակցեն ինչպես Եվրոմիության, այնպես էլ միջազգային տարբեր կազմակերպությունների շրջանակներում, նկատի առնելով, որ Եվրոմիությունը մտադիր է այսուհետ ավելի ակտիվ քաղաքականություն վարել տարածաշրջանում՝ մեծացնելով իր քաղաքական և տնտեսական ներգրավվածությունը տարածաշրջանի երկրներում, այդպիսով նպաստելով համագործակցության զարգացմանն ու հակամարտությունների կարգավորմանը:
Վարչապետն առաջարկել է Ֆինլանդիային ակտիվ մասնակցություն ունենալ տարածաշրջանային ծրագրերին, որոնցից մեկն էլ գարնանը Երևանում Եվրոմիության հովանավորությամբ կազմակերպվելիք Տեղեկատվական տեխնոլոգիաներին նվիրված համաժողովի անցկացմանը Ֆինլանդիայի հնարավոր աջակցությունը և մասնակցությունը կարող է լինել: Անդրանիկ Մարգարյանը ցանկալի է համարել նաև մայիսին Նյու-Յորքում կայանալիք գործարար-համաժողովին Ֆինլանդիայի ակտիվ մասնակցությունը:
Դեսպան Տիմո Լահելման, ողջունելով Հայաստանի անդամակցությունը Եվրախորհրդին, նաև Եվրոմիության հետ ակտիվ համագործակցությունը, իր երկրի անունից պատրաստակամություն է հայտնել հնարավորինս աջակցել ԼՂՀ հակամարտության խաղաղ ճանապարհով կարգավորմանը՝ ընդգծելով, որ 1995թ. մեկ տարի աշխատելով ԵԱՀԿ Մինսկի խմբում, բավականաչափ տեղյակ է խնդրին և շահագրգիռ՝ դրա շուտափույթ լուծմանը: Դեսպանը նշել է, որ Հայաստանի և Ֆինլանդիայի տնտեսական համագործակցությունը բավականին ցածր մակարդակի վրա է: Ըստ նրա, պատկերը հնարավոր է էապես փոխել՝ ստեղծելով անհրաժեշտ օրենսդրական դաշտ և ցուցահանդեսների ու գործարար-համաժողովների միջոցով հնարավորություն տալ երկրների գործարարներին միմյանց հետ շփվել և համագործակցության եզրեր գտնել:
