ուրբաթ, 7 մայիսի 2004
ՀՀ վարչապետ Անդրանիկ Մարգարյանի ուղերձը մայիսի 9-ի՝ Հաղթանակի և խաղաղության օրվա առթիվ
Սիրելի հայրենակիցներ,
Ջերմորեն շնորհավորում եմ Հաղթանակի և խաղաղության տոնի առթիվ: Օրվա խորհրդին հաղորդակից՝ ամեն տարի այս հրաշալի տոնին մենք մեկ անգամ ևս համակվում ենք միասնության ու համախմբվածության, ազգային ոգու և արժանապատվության նվիրական զգացումներով, որոնց շնորհիվ ձեռք են բերվել մեր բոլոր պատմական հաջողություններն ու հաղթանակները: Եվ այսօր, երբ ամրապնդում ենք արդեն իր գոյության երկրորդ տասնամյակը թևակոխած մեր անկախ պետականությունը, չենք կարող չգիտակցել, որ այդ ճանապարհին դեռևս հանդիպող բազմաթիվ փորձությունները դիմագրավելու կարևոր պայմաններից մեկը անցյալի հերոսական էջերի ոգեկոչումն է: Մեր խաղաղ և հուսալի ապագան կերտելու համար մենք պետք է առաջին հերթին գնահատենք մեր պատմական հաղթանակները՝ գլուխ խոնարհենք հարյուր հազարավոր այն քաջորդիների հիշատակի առջև, ովքեր իրենց կյանքը զոհաբերեցին հայրենիքի անկախության, հարատևության ու խաղաղության համար:
Մեր հերոսական ժողովուրդն իր անունը փառքով պսակեց նաև երկրորդ համաշխարհային պատերազմում: Խորհրդային բանակի շարքերում և պարտիզանական ջոկատներում, իսկ աշխարհասփյուռ հայությունը՝ դաշնակից երկրների բանակներում ու դիմադրական շարժումներում իր հերոսական պայքարով արժանի ներդրում ունեցավ ֆաշիզմի դեմ տարած մեծ հաղթանակի գործում: Հաղթանակ, որը խաղաղ ու ստեղծագործ աշխատանքի նոր սկիզբ հանդիսացավ ինչպես ամբողջ քաղաքակիրթ աշխարհի, այնպես էլ մեր ժողովրդի համար:
Ազատության տենչով ու խաղաղ գալիքի հավատով կերտվեցին նաև մեր նորագույն պատմության փառավոր էջերը՝ արցախյան ազատամարտի խրամատներում, իսկ 1992թ. մայիսի 9-ին Շուշիի հերոսական առումը հայոց ոգու և զենքի հաղթարշավի սքանչելի վկայությունն է մեր օրերում:
Շնորհավորելով հայրենիքում, սփյուռքում և Արցախում բնակվող մեր բոլոր հայրենակիցներին, մեր վետերաններին՝ Հաղթանակի և խաղաղության տոնի առթիվ, մաղթում եմ առողջություն, խաղաղ երկինք ու ստեղծագործ աշխատանք՝ հանուն մեր անկախ պետականության ամրապնդման, սերունդների անկանգ երթի, մեր երկրի և ժողովրդի հետագա զարգացման ու բարգավաճման:
