չորեքշաբթի, 28 ապրիլի 2004
Այսօր ՀՀ վարչապետ Անդրանիկ Մարգարյանն ընդունել է Եվրոպական կենսաքիմիական ընկերությունների դաշնության (FEBS) անդամների պատվիրակությանը՝ պրոֆեսոր Գայ Դիրհայմերի գլխավորությամբ: Վարչապետը կառավարության անունից ողջունել է տարբեր երկրներ ներկայացնող դաշնության անդամ պրոֆեսորների այդքան ներկայացուցչական այցը մեր երկիր, որի նպատակն է հնարավորինս աջակցել Հայաստանում կենսաքիմիայի զարգացմանը: Պատվիրակությանը հյուրընկալած Հայաստանի կենսաքիմիկոսների ասոցիացիայի պրեզիդենտ, Կենսաքիմիայի ինստիտուտի տնօրեն, ակադեմիկոս Արմեն Գալոյանը վարչապետի հետ հանդիպման ընթացքում ներկայացրել է մինչ օրս Եվրոպական կենսաքիմիական ընկերությունների դաշնության կողմից ՀՀ ԳԱԱ կենսաքիմիայի ինստիտուտին, հանրապետության մի շարք գիտական հաստատություններին ցուցաբերված աջակցությանը:
Վարչապետ Անդրանիկ Մարգարյանը շնորհակալություն է հայտնել դաշնության ղեկավարությանը՝ ինչպես մեր երկրում գիտության զարգացմանն աջակցելու, այնպես էլ Հայաստանի կենսաքիմիկոսների ասոցիացիան եվրոպական կենսաքիմիական ընկերությունների դաշնության ասոցիատիվ անդամ ընտրելու որոշման համար: Դա, ըստ կառավարության ղեկավարի, վկայում է Հայաստանի կենսաքիմիկոսների և հատկապես ՀՀ ԳԱԱ կենսաքիմիայի ինստիտուտի գիտական նշանակալի նվաճումների մասին: Հայտնաբերված նյութերը, վարչապետի հավաստմամբ, ունեն մեծ և գործնական նշանակություն մի շարք իմունային, ինֆեկցիոն, նյարդային հիվանդությունների բուժման համար: Կատարված աշխատանքները, որոնք մեծ հեռանկար են բացում շատ երկրների բազմաթիվ գիտական կենտրոնների համար, Անդրանիկ Մարգարյանը կարևոր է համարել նաև մեր հանրապետության տնտեսության համար:
Վարչապետը նշել է, թե ակնկալում է, որ մոտիկից ծանոթանալով Հայաստանի կենսաքիմիկոսների գիտական գործունեությանը, պրոֆեսորները կհուշեն, թե ո՞ր գիտագործնական նվաճումներն են այսօր ամենահրատապն ու առաջնայինը և ի՞նչ հնարավորություններ կան եվրոպական ֆոնդերից օգտվելու համար: Դա, ըստ Անդրանիկ Մարգարյանի, կօգնի նաև մեր երկրի կառավարությանը՝ հանրապետությունում գիտության զարգացման առավել առաջավոր գիտական ուղղությունների ճշտման և այդ ուղղությունների զարգացման նպատակով նպաստավոր պայմաններ ստեղծելու համար:
Պատվիրակության անդամները վարչապետ Անդրանիկ Մարգարյանին պատմել են 41 ընկերություններ միավորող և շուրջ 40 հազար անդամ ունեցող Եվրոպական կենսաքիմիական ընկերությունների դաշնության գործունեության ու առաջիկա ծրագրերի մասին և նաև իրենց բավականին մեծ տպավորությունները ներկայացրել տնտեսական դժվարին պայմաններում աշխատող հայ գիտնականների մասին՝ պատրաստակամություն հայտնելով որոշակի ծրագրերի շրջանակներում աջակցել նրանց, այդպիսով նաև աջակցելով հայրենական գիտությունը զարգացնելու՝ Հայաստանի կառավարության ջանքերին: