Այս բաժինը հնարավորություն է տալիս գրավոր արտահայտել Ձեր կարծիքը, տեսակետը և դիրքորոշումը: Ի տարբերություն դիմումների, նամակները պաշտոնական ընթացակարգով քննության չեն առնվում:

Ձեր պաշտոնական դիմումը ՀՀ կառավարությանն այլևս թափանցիկ ընթացակարգ ունի: Մեր կայքի շնորհիվ Դուք կարող եք տեղեկանալ, թե կառավարության որ մարմնին կամ պաշտոնյային է Ձեր առձեռն հանձնած կամ փոստով ուղարկած դիմումը վերահասցեագրվել:

Որոնում

iGov.am iPhone/iPad application Այսուհետ կարող եք օգտվել մոբայլ սարքերի համար iGov.am հավելվածից, որը հնարավոր է ներբեռնել AppStore-ում և Google Play-ում:

Թեժ գիծ

Տեղեկատվության ազատության ապահովման պատասխանատու
Ներքին և արտաքին ազդարարման պատասխանատու

1-17(զանգն անվճար է)

+374 (10) 527-000(արտերկրից զանգերի համար)

Պաշտոնական էլ. փոստ

(միայն www.e-citizen.am համակարգով ծանուցումների համար)

Էլ. կառավարում

Պաշտոնական լրահոս

հինգշաբթի, 16 հուլիսի 2015

Տեղի է ունեցել կառավարության նիստ






 Այսօր տեղի է ունեցել ՀՀ կառավարության հերթական նիստը, որը վարել է ՀՀ վարչապետ Հովիկ Աբրահամյանը:
Մինչ օրակարգով նախատեսված հարցերի քննարկմանն անցնելը վարչապետ Հովիկ Աբրահամյանը նշել է. «Ես ուզում եմ մի քանի հանձնարարական տալ և առաջարկություն ներկայացնել: Առաջարկում եմ Տնտեսական մրցակցության պաշտպանության հանձնաժողովին՝ Էկոնոմիկայի նախարարության և Քաղաքացիական ավիացիայի գլխավոր վարչության հետ համատեղ ամենայն մանրամասնությամբ ուսումնասիրել Հայաստանի ավիափոխադրողների շուկան, թե՛ գների, թե՛ ուղղությունների և թե՛ թռիչքների ժամկետների և պայմանների ուղղությամբ: Նաև բանակցել այն ընկերությունների հետ, որոնք գիշերային թռիչքներ են կազմակերպում. . թռիչքները կարելի է տեղափոխել նաև առավոտյան ժամերին: Գիշերային թռիչքները անհարմարություն են ստեղծում զբոսաշրջության համար, քանի որ եթե զբոսաշրջիկը ժամանում է Երևան առավոտյան ժամը 5-ին, ապա մինչև 14:00-ն պետք է փնտրի, թե որտեղ անցկացնի ժամանակը կամ լրացուցիչ վճարի հյուրանոցի համար: Ուստի, պարոն Ճշմարիտյան, հարկավոր է մանրամասն քննարկել և ներկայացնել առաջարկություն»:
Այնուհետև վարչապետ Հովիկ Աբրահամյանը խոսքը փոխանցել է ՀՀ էներգետիկայի և բնական պաշարների նախարար Երվանդ Զախարյանին՝ ներկայացնելու նաիրիտցիների պահանջը: «Այն խոստումը, որ տրվել էր՝ ամբողջությամբ վճարել նաիրիտցիների աշխատավարձը, կառավարությունն այդ գումարներն արդեն հատկացրել է: Ուղղակի չեմ հասկանում իրենց անհանգստության, հավաքի նպատակը: Խնդրում եմ պարզաբանել», - ասել է վարչապետը:

Երվանդ Զախարյանը նշել է. «Կոլեկտիվի հետ հանդիպման ժամանակ պայմանավորվածություն ձեռք բերվեց, որպեսզի մինչև հուլիսի 15-ը ամբողջությամբ վճարվի աշխատավարձի պարտքը, որը մոտավորապես 5 միլիարդ 310 մլն դրամի սահմաններում է: Այսօր արդեն մենք հնարավորություն ունենք վճարելու այդ գումարը: Հարցը հետևյալն է. մի շարք աշխատակիցների կողմից դժգոհություններ և բողոքի գրություններ են գրվել իմ և գործարանի բաժնետիրական ընկերության տնօրենի անունով՝ աշխատավարձի սխալ հաշվարկների հետ կապված: Այժմ ուսումնասիրություններ են կատարվում այդ աշխատավարձերի ճշտումների ուղղությամբ, իմ կարծիքով, 1-2 օրերի ընթացքում այդ աշխատանքները կավարտվեն: Որոշակի վճարումների հետ կապված փաստաթղթային ձևակերպումներ կան, ձևն արդեն մշակվել է, այսօրվանից գործընթացը սկսվում է: Մեր առաջարկությունը հետևյալն է. քանի որ որոշակի ժամանակ է պահանջվում բոլոր փաստաթղթային ձևակերպումները կատարելու համար, յուրաքանաչյուր խմբաքանակ պատրաստ լինելուն պես կարող ենք վճարել, այսինքն՝ շաբաթ օրը, պատրաստության աստիճանից ելնելով՝ հաջորդ օրերի ընթացքում: Վճարումները կարող են ձգվել 10-15 օր: Աշխատակիցների պահանջը հետևյալն է, որ վճարումները կատարվեն միանգամից, ամբողջ պարտքի չափով՝ 5 միլիարդ 310 մլն դրամի սահմաններում, բոլորը վճարվի միանգամից: Միանգամից վճարելու համար իրենք ստիպված կլինեն մոտավորապես 10-15 օր սպասել: Որպեսզի այդքան չսպասեն, մենք առաջարկում ենք յուրաքանչյուր պատրաստ դիմումից հետո վճարումները կատարել, փոխանցելով իրենց հաշվին: Պահանջը դա է, ուրիշ պահանջներ այսօր աշխատակիցների կողմից չկան»:
Վարչապետ Հովիկ Աբրահամյանը պահանջել է հստակություն մտցնել վճարումների գործընթացում, անհրաժեշտ պարզաբանումներ տալ մարդկանց, որպեսզի նրանք, ովքեր աշխատավարձի ճշգրտումների խնդիր չունեն, իրենց գումարներն անմիջապես ստանան: «Մենք կարող ենք հայտարարել, որ եթե կոլեկտիվի անդամները, աշխատակիցները պատրաստ են սպասել մինչև ամսվա վերջ, ապա մենք հուլիսի վերջին միանգամից վճարումները կարող ենք կատարել: Եթե չեն կարող սպասել և կան աշխատակիցներ, որոնք ուզում են հիմա ստանալ, մենք պատրաստ ենք այս ընթացքում կատարել վճարումները: Երկու տարբերակին էլ մենք համաձայն ենք»,- նշել է Երվանդ Զաքարյանը:
Վարչապետը նախարարին հանձնարարել է քննարկել նաիրիտցիների առաջարկությունները:


Իրավակարգավորումները համապատասխանեցվում են օրենսդրությանը


Կառավարությունը փոփոխություններ և լրացումներ է կատարել իր 2014թ. օգոստոսի 28-ի որոշման մեջ, որով հստակեցվում են «Պետական պաշտոններ զբաղեցրած անձանց սոցիալական երաշխիքների մասին» ՀՀ օրենքով սահմանված կենսաթոշակի իրավունք տվող պայմանները, սահմանված իրավակարգավորումները համապատասխանեցվում են կատարված օրենսդրական փոփոխություններին:
Անհրաժեշտ փոփոխություններ կատարելով «Վարժական հավաքների և զինվորական ծառայության ընթացքում զոհված (մահացած) զինծառայողների հուղարկավորության, գերեզմանների բարեկարգման, տապանաքարերի պատրաստման և տեղադրման հետ կապված ծախսերը փոխհատուցելու մասին» 1997թ. օգոստոսի 18-ի որոշման մեջ, կառավարությունը փոխհատուցման տրամադրման գործընթացը համադրելի է դարձրել գործող բյուջետային վճարումների համակարգին, պարզեցրել շահառուների համար գումարների ստացման գործընթացը:
Մեկ այլ որոշման մեջ կատարված փոփոխությունով գործադիրը հնարավորություն է ստեղծել 1.800.000 դրամը չգերազանցող արտոնյալ ուսանողական վարկը ստանալ ուսումնառության ամբողջ ընթացքում՝ անկախ վարկավորման անընդհատությունից:


Սահմանվել են գազատարների անվտանգության գոտիները


Կառավարությունը հաստատել է Գազի տնտեսությունում գազատարների և դրանց վրա գտնվող ինժեներական կառույցների անվտանգության գոտիների չափերը և դրանց օգտագործման կարգը:
«Հաննի-Արմին» ՍՊԸ-ի՝ նորագույն տեխնոլոգիայի հիման վրա արևաջերմային տուրբինային էլեկտրակայանի կառուցման ծրագրի իրականացմանն աջակցելու նպատակով ՀՀ հանրային ծառայությունները կարգավորող հանձնաժողովին առաջարկվել է ՍՊԸ-ին տրամադրել համապատասխան արտոնագիր:
Կառավարության որոշմամբ «ՀՌԼԿ» փակ բաժնետիրական ընկերությունը գործունեության դադարեցման կապակցությամբ լուծարվել է:
Գործադիրը թույլատրել է «ՍՊԱ Սիգարոն» ՍՊԸ կողմից 2014թ. հուլիսի 21-ի հայտարարագրով «Վերամշակում՝ մաքսային տարածքում» ընթացակարգի ժամկետը երկարաձգել մինչև 2016թ. հունվարի 1-ը:
Մեկ այլ որոշմամբ փոփոխություններ և լրացումներ կատարելով 2014թ. դեկտեմբերի 18-ի թիվ 1515-Ն որոշման մեջ, ՀՀ տրանսպորտի և կապի նախարարությանը վերապահվել են պատվիրատուի լիազորություններ:


Հստակեցվում է տեղեկատվություն հավաքագրելու կարգը


Կառավարությունը նոր խմբագրությամբ է հաստատել շինարարության ոլորտում պետպատվերի շրջանակում և վարկային, դրամաշնորհային ծրագրերով իրականացվող շինարարական ու պատմամշակութային անշարժ հուշարձանների վերականգնողական աշխատանքների ծավալների վերաբերյալ տեղեկատվություն հավաքագրելու կարգը, ինչի շնորհիվ կբարձրանա հսկողության արդյունավետությունը, կհստակեցվի սահմանված հարկային պարտավորությունների կատարումը:
ՀՀ քաղաքացիական ավիացիայի օդերևութաբանական ապահովման կանոնակարգը լրացվել է նոր բովանդակությամբ, որով կկանոնակարգվի օդերևութաբանական վճարովի տեղեկատվության տրամադրման կարգը:
Գործադիրը հաստատել է ՀՀ կառավարությանն առընթեր անշարժ գույքի կադաստրի պետական կոմիտեի՝ պետական բյուջեով նախատեսված հատկացումների հաշվին վարկային քարտային հաշիվներով շրջանառվող միջոցների չափաքանակը:
Ուժը կորցրած է ճանաչվել Սյունիքի մարզում փոքր ՀԷԿ-ի կառուցման նպատակով «Սուրբ Աղբյուր» ՍՊԸ-ին նպատակային օգտագործման համար հողամաս տրամադրելու որոշումը՝ սահմանված 3 տարվա ժամկետում չօգտագործվելու պատճառով:
Մեկ այլ որոշմամբ ուժը կորցրած է ճանաչվել կառավարության 2012թ. մայիսի 24-ի «ՀՀ Սյունիքի մարզի Սպանդարյանի գյուղական համայնքի հողերի օգտագործման ժամանակավոր սխեման հաստատելու մասին» թիվ 657-Ն որոշումը:


Կբարձրացվի դիաբետով հիվանդ երեխաների բուժման որակը


Կառավարությունը որոշում է ընդունել ՀՀ կարիքների համար ինսուլին դեղերի գնման 2015-2019թթ. գործընթացը կազմակերպելու մասին, նպատակ ունենալով անխափան ապահովել դիաբետով տառապող երեխաների և երիտասարդների հակադիաբետիկ դեղի պահանջարկը: Արդյունքում կբարձրացվի դիաբետով հիվանդ երեխաների բուժօգնության որակը, կբարելավվի նրանց առողջական վիճակը:
Երկու այլ որոշումներով հստակեցվել են մանուկների և պատանիների՝ ֆիզիկական կուլտուրայով և սպորտով զբաղվելու պայմանների նվազագույն չափորոշիչները, հաստատվել են ՀՀ պետական բյուջեից ֆինանսավորվող մանկապատանեկան մարզադպրոցներում աշխատող մարզիչ-մանկավարժների դրույքաչափերի, հավելավճարների և լրավճարների հաշվարկման և վճարման կարգը:


Լուծում են ստանում քաղաքացիների բնակարանային խնդիրները


Զոհված զինծառայող Զորիկ Գևորգյանի ընտանիքին բնակարան ձեռք բերելու համար պետական ֆինանսական աջակցություն ցուցաբերելու նպատակով կառավարությունը որոշել է հատկացնել 4.000.0 հազար դրամ:
Կառավարությունը որոշել է Երևան քաղաքի Մոլդովական, Շիրակի, Վարդաշեն 6-րդ փողոցի հանրակացարանային մասնաշենքերում բնակվող 11 քաղաքացիներին նվիրել իրենց կողմից զբաղեցրած բնակելի տարածքները, իսկ Երևանի Մոլդովական փողոցի թիվ 1 հանրակացարանային մասնաշենքում բնակվող Ադրբեջանից բռնագաղթած 3 ընտանիքներին թույլատրել է սահմանված կարգով սեփականաշնորհել զբաղեցրած բնակելի տարածքները:
Մեկ ուրիշ որոշմամբ Գյումրի քաղաքի Երկաթուղայինների փողոցի 62 հասցեում գտնվող վարչական շենքը բնակելի շինության վերափոխելու ժամկետը երկարաձգել է մինչև 2015թ. նոյեմբերի 1-ը, շինարարական աշխատանքները չավարտելու պատճառով: Նշված շենքում բնակություն կհաստատեն 7 ընտանիքի 30 անդամներ:
Կառավարությունը հողամասը որպես նվիրաբերություն ընդունելու մասին որոշումով Տավուշի մարզի Բերդի քաղաքային համայնքում անասնաբուժական սպասարկման կենտրոնի շենքի կառուցման հնարավորություն է ստեղծել, որով կբարձրանա տարածաշրջանի համայնքների անասնաբուժական ծառայությունների մատուցման արդյունավետությունը:
Փոքր ու միջին ձեռնարկատիրության սուբյեկտներին հաշվապահական հաշվառման ծառայությունների մատուցման կենտրոնի բնականոն ընթացքն ապահովելու նպատակով «ՓՄՁ ձեռնարկատիրության զարգացման կենտրոն» հիմնադրամին անհատույց օգտագործման իրավունքով տրամադրված տարածքի ժամկետը ավելացվել է 3 տարի ժամանակով:
 

 

Այլ հարցեր


«Լիցենզավորման մասին» ՀՀ օրենքին համաձայն կառավարությունը «Գ.Ռ.Օ.Մ» ՍՊԸ-ին տվել է թմրամիջոցների և հոգեմետ նյութերի՝ ՀՀ կառավարության կողմից սահմանված պրեկուրսորների արտահանման, ներմուծման և մեծածախ առևտրի գործունեության իրականացման լիցենզիա՝ երեք տարի գործողության ժամկետով:
Արմավիրի մարզի Հառիճավանքի Թրբանճյան ընծայարանի (ավագ դպրոց) 11-րդ դասարանի սովորող Սարգիս Մեհրաբյանին մինչև 2016թ. ամառային զորակոչը պարտադիր զինվորական ծառայության զորակոչից տրվել է տարկետում: Մինչև 2017թ. ձմեռային զորակոչը տարկետում է տրվել նաև ՌԴ ազգերի բարեկամության համալսարանի ասպիրանտ Աղվան Արզումանյանին:
Վարչապետ Հովիկ Աբրահամյանը ՀՀ արտաքին գործերի նախարար Էդվարդ Նալբանդյանին շնորհավորել է ծննդյան օրվա առթիվ, մաղթել բեղմնավոր, արդյունավետ աշխատանք:

 

 

Օգոստոս 2020
ԵրկԵրքՉրքՀնգՈւրՇբթԿրկ
 12
3456789
10111213141516
17181920212223
24252627282930
31 

-

Արխիվ