երեքշաբթի, 25 մարտի 2014
Քննարկվել են ազգային բրենդի մշակման ռազմավարությանը վերաբերող հարցեր
Վարչապետ Տիգրան Սարգսյանն ընդունել է Հայաստանի բրենդավորման ռազմավարության մշակման աշխատանքային խմբի ներկայացուցիչներին: Հայաստանի բրենդավորման մրցունակ ռազմավարության (ներառյալ եռամյա կտրվածքով բրենդի հաղորդակցման մանրամասն ռազմավարություն) և ծրագրի մշակման աշխատանքներով զբաղվում է GK Brand ամերիկյան ընկերությունը:
Հանդիպման ընթացքում GK Brand ընկերության տնօրեն Վազգեն Քալայջյանը ներկայացրել է Ազգային բրենդի մշակման ուղղությամբ ձեռնարկված քայլերը: Վարչապետ Սարգսյանը հետաքրքրվել է իրականացվող աշխատանքների մասին և ազգային բրենդի մշակման աշխատանքային խմբի անդամների հետ քննարկել առաջիկա անելիքները:
2014 թ. փետրվարի 20-ին ՀՀ կառավարությունում ստորագրվել են Ազգային բրենդի մշակման աշխատանքների իրականացմանն ուղղված նվիրաբերության հուշագիր և Ազգային բրենդի ստեղծման վերաբերյալ պայմանագիր՝ Հայաստանի բրենդավորման ռազմավարության մշակման ուղղությամբ համագործակցության վերաբերյալ: Բրենդավորման ռազմավարությունը կնպաստի Հայաստանի զբոսաշրջային և ներդրումային գրավչության բարձրացմանը, տնտեսության զարգացմանը և միջազգային հեղինակության բարձրացմանը:
