Հայաստանի Հանրապետության Կառավարություն

Վարչապետ Տիգրան Սարգսյանի գլխավորությամբ կառավարությունում տեղի է ունեցել «Նորավանք» գիտակրթական հիմնադրամի հոգաբարձուների խորհրդի հերթական նիստը:
Օրակարգի առաջին հարցով ներկայացվել են հիմնադրամի 2013 թվականի գործունեության արդյունքները: Զեկուցվել է, որ հաշվետու ժամանակահատվածում հիմնադրամի կողմից պատրաստվել է երեք զեկուցագիր, հրատարակվել` գիտավերլուծական 4 գիրք, կազմակերպվել` հինգ միջազգային գիտաժողով, հրապարակվել` 24 ամսագիր և 76 հոդված:
Նախորդ տարվա ընթացքում հիմնադրամի աշխատակիցները 26 զեկույցներով մասնակցել են 18 միջազգային և 6 հանրապետական գիտաժողովների: Տեղեկացվել է, որ «Նորավանք»-ի 2000 բաժանորդ ունեցող կայքի հաճախելիությունների թիվը նախորդ տարում հասել է 1,5 միլիոնի:
Հիմնադրամի հայագիտական կենտրոնն աշխատանքներ է տանում նաև սփյուռքահայության գիտավերլուծական մտավոր ներուժի բացահայտման ուղղությամբ: Այդ առումով, հրատարակվել է նաև «Սփյուռքի գիտավերլուծական հանրությունը» խորագրով գիրք:
Զեկուցվել է, որ հիմնադրամը սերտորեն համագործակցում է ՀՀ սփյուռքի և պաշտպանության նախարարությունների հետ:
Այնուհետև քննարկվել և հաստատվել է հիմնադրամի 2014 թվականի բյուջեն: