Հայաստանի Հանրապետության Կառավարություն

Այսօր տեղի է ունեցել ՀՀ կառավարության հերթական նիստը, որը վարել է ՀՀ վարչապետ Տիգրան Սարգսյանը:
ՀՀ կառավարությունը հավանություն է տվել 2014թ. պետբյուջեի ցուցանիշներում կատարվելիք փոփոխություններին, ՀՀ Ազգային Ժողովում քննարկման արդյունքներով ԱԺ մշտական հանձնաժողովների, պատգամավորական խմբերի, խմբակցությունների և անհատ պատգամավորների կողմից ՀՀ կառավարություն ներկայացված առաջարկությունների և եզրակացությունների ամփոփաթերթիկին: ՀՀ պետական կառավարման մարմինների ղեկավարները երկօրյա ժամկետում պետք է ՀՀ ֆինանսների նախարարություն ներկայացնեն առաջարկություններ ամփոփաթերթիկում արտահայտված ՀՀ կառավարության դիրքորոշման ձևակերպումների վերաբերյալ, ՀՀ ֆինանսների նախարարը լրամշակված տարբերակը պետք է ներկայացնի ՀՀ կառավարություն, իսկ կառավարության աշխատակազմի ղեկավար-նախարարը` սահմանված կարգով` ՀՀ Ազգային Ժողով: Հարցի քննարկման ընթացքում նշվել է, որ բյուջեի նախագծի վերաբերյալ ստացվել է 326 առաջարկություն, որից 31-ն ընդունվել է ամբողջությամբ կամ մասնակիորեն, 208-ին տրվել համապատասխան պարզաբանում և միայն 87-ը ընդունելի չի համարվել:

Պետությունը կփոխհատուցի սահմանամերձ բնակավայրերի սովորողների ուսման վճարը

Գործադիրը հաստատել է ՀՀ նախնական մասնագիտական (արհեստագործական) և (կամ) միջին մասնագիտական կրթական ծրագրեր իրականացնող պետական ուսումնական հաստատություններում ուսանողական նպաստ և պետական կրթաթոշակ տրամադրելու կարգը, որի համաձայն նման հաստատություն ընդունված սահմանամերձ կամ բարձրլեռնային բնակավայրերի ուսանողների ուսուցումը կկազմակերպվի նպաստի ձևով ուսման վճարի լրիվ փոխհատուցմամբ: Որոշումը կարևորել է ՀՀ վարչապետ Տիգրան Սարգսյանը, քանի որ կրթության հասանելիությունը աղքատության հաղթահարման արդյունավետ բաղադրիչներից է: Վարչապետը հարցը ներկայացնող ՀՀ կրթության և գիտության նախարարության ղեկավարությանը հանձնարարել է մամուլի միջոցով սահմանամերձ և բարձրլեռնային բնակավայրերի սովորողներին հասցնել կառավարության այս որոշման բովանդակությունը:
Նիստում հաստատվել է ՀՀ բարձրագույն ուսումնական հաստատությունների առկա ուսուցման 2014-2015թթ. ուսումնական տարվա մասնագիտությունների և ընդունելության քննությունների ցանկը:
Մեկ այլ որոշմամբ կառավարությունն ավելի քան 37 մլն դրամ է հատկացրել Գյումրի քաղաքի Վ. Աճեմյանի անվան դրամատիկական թատրոնի մասնակի նորոգման, Վանաձորի N 3 մշակույթի տան ջեռուցման համակարգի կառուցման նախագծանախահաշվային փաստաթղթերի մշակման, Երևանի պետական տեխնոլոգիական քոլեջի հիմնանորոգման աշխատանքները ֆինանսավորելու նպատակով:

Կկանխվեն օտարերկրյա քաղաքացիների իրավունքի խախտումները

ՀՀ կառավարությունը հավանություն է տվել Վարչական իրավախախտումների վերաբերյալ ՀՀ օրենսգրքում փոփոխություն և լրացումներ կատարելու օրենքի նախագծին, որի ընդունմամբ կբարելավվի օտարերկրյա քաղաքացիների և քաղաքացիություն չունեցող անձանց իրավունքների խախտումները կանխելու իրավակիրառ պրակտիկան:
Գործադիրը քննարկել է «Շահութահարկի մասին» օրենքում փոփոխություն կատարելու օրինագիծը, որը օրենսդրական նախաձեռնության կարգով ներկայացրել են ՀՀ Ազգային Ժողովի մի խումբ պատգամավորներ: Նրանք առաջարկում են սահմանել, որ գործարար ծրագրի մեկնարկման ու դրան հաջորդող երկու հաշվետու տարվա շահութահարկի գումարը նվազեցվում է նոր աշխատատեղերի մասով համապատասխան տարվա ընթացքում հաշվարկված լրացուցիչ աշխատավարձի 100 տոկոսի, բայց ոչ ավելի, քան հաշվետու տարվա համար հաշվարկված փաստացի շահութահարկի գումարի 50 տոկոսի չափով` ներկայումս գործող 30 տոկոսի փոխարեն: Նիստի մասնակիցներին տեղեկացվել է, որ օրենքի գործողության մոտ ութ ամսվա ընթացքում ոչ մի գործարար չի դիմել նշված արտոնությունից օգտվելու խնդրանքով: Մտքերի փոխանակության ընթացքում դրա պատճառ է համարվել պատշաճ իրազեկվածության բացակայությունը: Այս հիմնավորմամբ կառավարությունը նպատակահարմար չի համարել պատգամավորների առաջարկության ընդունումը: Վարչապետը ՀՀ էկոնոմիկայի նախարարությանը հանձնարարել է տնտեսվարողներին հասցնել օրենքով սահմանված արտոնության էությունը:
Քննության է առնվել ԱԺ պատգամավոր Միքայել Մելքումյանի` օրենսդրական նախաձեռնության կարգով ներկայացրած «Շրջանառության հարկի մասին» օրենքում փոփոխություն կատարելու օրենքի նախագիծը, որով առաջարկվում է առևտրական և արտադրական գործունեությունից ստացվող եկամտի համար շրջանառության հարկի ներկայումս սահմանված 3.5 տոկոս դրույքաչափը նվազեցնել մինչև 2.5 տոկոս: Գտնելով, որ փոքր և միջին ձեռնարկատիրության սուբյեկտների հարկման համակարգի հնարավոր վերանայումը պետք է կատարվի համակարգային ձևով, կառավարությունը Տիգրան Սարգսյանի հանձնարարությամբ պատգամավորին հրավիրելու է մասնակցել հարցի քննարկմանը:
Վերը նշված օրենքների նախագծերը և կառավարության եզրակացությունները սահմանված կարգով կներկայացվեն ՀՀ Ազգային Ժողով:

Սահմանափակվում են կանխիկ ծախսերը

ՀՀ կառավարությունը փոփոխություններ և լրացումներ է կատարել իր նախկին որոշումներից մեկում, հաստատել ՀՀ ֆինանսների նախարարության կողմից ՀՀ 2013թ. պետբյուջեով նախատեսված միջոցների հաշվին վարկային քարտային հաշիվներով շրջանառվող միջոցների չափաքանակները: Բյուջեներով նախատեսված միջոցների հաշվին բյուջետային հիմնարկների աշխատողների աշխատավարձը և դրան հավասարեցված վճարումները, գործուղման ծախսերն ու կրթաթոշակները կհատկացվեն բանկային վճարային քարտերին փոխանցման միջոցով, ինչպես նաև հնարավորություն կընձեռվի ՀՀ ֆինանսների նախարարության կողմից որոշ ծախսեր կատարել վարկային քարտերի միջոցով: Վարչապետ Տիգրան Սարգսյանը նիստի մասնակիցներին հորդորել է, որպեսզի նրանց ղեկավարած նախարարությունները և գերատեսչությունները գնումներն իրականացնեն կորպորատիվ քարտերով, պարզեցված ընթացակարգով: Այդպես վարվելու դեպքում հնարավոր կլինի հրաժարվել կանխիկ գործարքներից:
Գործադիրը հաստատել է նոր աշխատողի համար գրանցման հայտում և (կամ) եկամտային հարկի ամփոփ հաշվարկում ներառվելիք` անձին վերաբերող օրենսդրությամբ որպես սահմանափակ օգտագործման ենթակա տեղեկություն պարունակող գրանցման հայտը և (կամ) եկամտային հարկի ամփոփ հաշվարկը հարկային մարմին ներկայացնելու կարգը: Որոշման ընդունմամբ եկամտային հարկով հարկման նպատակով հնարավորություն է ստեղծվում եկամտային հարկի ամփոփ հաշվարկ ներառել այն անձանց, ում վերաբերող տեղեկությունը օրենսդրությամբ սահմանված է որպես սահմանափակ օգտագործման ենթակա տեղեկություն:
Կառավարությունն իր նիստում փոփոխություններ և լրացումներ է կատարել ավելի վաղ ընդունած որոշումներից մեկում, որով սահմանվել է ՀՀ օդանավակայաններում անցագրային և ներօբյեկտային վերահսկողության կարգը: Որոշման ընդունումը թույլ կտա Եվրամիության չափորոշիչներին համապատասխան արդիականացնել անցագրերի հատկացման աշխատանքը, ստեղծել բոլոր տեսակի անցագրերի տվյալների պաշտպանված շտեմարան, որը հնարավորություն կստեղծի կատարելագործել անցագրային և ներօբյեկտային վերահսկողությունը:

Վերականգնվում են կառուցապատման ծրագրից տուժած անձանց գույքային կորուստները

Հաշվի առնելով ՀՀ վարչապետի 2012թ. մարտի 2-ի որոշմամբ ստեղծված միջգերատեսչական հանձնաժողովի առաջարկությունները, ինչպես նաև «Ավելացված արժեքի հարկի մասին» օրենքի համապատասխան դրույթները և Երևան քաղաքի Փ. Բուզանդի փ. 13-21 հասցեներում ձախողված կառուցապատման ծրագրից տուժած անձանց գույքային կորուստները վերականգնելու նպատակով կառավարությունը հավանություն է տվել առաջարկված ծրագրին, որի կատարման դեպքում կլուծվի մի կողմից` նշված հասցեների շինարարության ավարտման հարցը, մյուս կողմից «Վիսկոն» ՍՊԸ-ի գործունեությունից տուժած մոտ 110 անձանց բավարարում տրամադրելու խնդիրը:
Իր նիստում կառավարությունն ընդունել է Երևան քաղաքի Պ. Պռոշյան և Դ. Դեմիրճյան փողոցների ու Սիրահարների զբոսայգու հարակից տարածքի նկատմամբ բացառիկ` գերակա հանրային շահ ճանաչելու որոշում: Նշված տարածքում արդեն իսկ հաստատվել է քաղաքաշինական ծրագրերի իրականացման անհրաժեշտությունը և ՀՀ կառավարության 2007թ. փետրվարի 19-ի որոշմամբ «Լոկալ Դիվելոփըրզ» ՍՊԸ-ն դրա ձեռքբերողն է: Ընկերությունը այդ վայրում մասամբ կատարել է օտարման գործընթաց և տարածքի նկատմամբ նոր բացառիկ` գերակա հանրային շահ ճանաչելու նպատակը նշված աշխատանքի շարունակումն է: Այսպիսով, մասնավոր ներդրումների հաշվին Երևանի կենտրոնից կվերանա կիսախարխուլ, ոչ սեյսմակայուն, ոչ բավարար խտությամբ և հիմնականում վթարային բնակելի ֆոնդը:
Փոփոխելով իր նախկին որոշումներից մեկը, կառավարությունը կարգավորել է փաստացի այլ սուբյեկտների սեփականությունը հանդիսացող և նրանց կողմից տնօրինվող, սակայն ՀՀ ԿԱ պետգույքի կառավարման վարչությանը հանձման ենթակա ոչ բնակելի տարածքների հետագա տնօրինումը:
Ավելի վաղ ընդունած իր որոշումներից մեկում գործադիրը կատարել է փոփոխություններ և լրացումներ` հաստատելով պետական սեփականություն հանդիսացող անշարժ գույքն անհատույց օգտագործման նպատակով համայնքներին, միջազգային հասարակական կազմակերպություններին և հիմնադրամներին տրամադրելու դեպքում պետությանն օժանդակող ծրագրի օրինակելի ձևը: Կան լրատվական գործունեություն իրականացնող մի շարք կազմակերպություններ, որոնք չեն համապատասխանում տարածքների անհատույց տրամադրման չափորոշիչներին: Նման դեպքերում կառավարությունը կարող է կիրառել այլ ընթացակարգ: Որոշումը պարտադրում է կառավարության որոշման նախագծում ներառել հանձնվող գույքի հաշվեկշռային կամ գնահատված արժեքը:

Կսահմանվեն հայ-ռուսական համալսարանի գործունեության պայմանները

ՀՀ կառավարությունը համաձայնություն է տվել «Հայաստանի Հանրապետության և Ռուսաստանի Դաշնության կառավարությունների միջև Երևան քաղաքում Հայ-ռուսական համալսարանի գործունեության պայմանների մասին» համաձայնագրի կնքման առաջարկությանը: Կողմերը սույն համաձայնագրով ամրագրում են ավելի վաղ ստեղծված Ռուս-հայկական համալսարանի գործունեության պայմանները: Համալսարանը ՀՀ և ՌԴ համատեղ վարման բարձրագույն մասնագիտական կրթության միջպետական կրթական հաստատություն է և կարող է ստանալ Ռուսաստանի Դաշնության ազգային գիտահետազոտական համալսարանի կարգավիճակ: Ուսուցումն իրականացվում է ռուսաց լեզվով` հայոց լեզվի պարտադիր դասավանդմամբ:
Վերաբաշխում կատարելով 2013թ. պետբյուջեում, փոփոխություններ և լրացումներ իր ավելի վաղ ընդունած որոշումներից մեկում, կառավարությունը Ռուսաստանի Դաշնության «Իգրա թի վի» հեռուստաընկերությունից «Ինչ: Որտեղ: Երբ:» հեռուստանախագծի արտոնագիրը ևս մեկ տարի ժամկետով ձեռք բերելու նպատակով ՀՀ կրթության և գիտության նախարարությանը հատկացրել է 12 միլիոն դրամ: Գումարը նվիրաբերության պայմանագրով կտրամադրվի «Փի-արտ» ՍՊԸ-ին:
Գործադիրը թույլատրել է 2013թ. դեկտեմբերի 2-3-ը կայանալիք հայ-ռուսական երրորդ միջտարածաշրջանային համաժողովի կազմակերպիչ նշանակված «Զարգացման հայկական գործակալություն» ՓԲԸ-ին բոլոր տեսակի գնումներն իրականացնել բանակցային ընթացակարգով:
Գործադիրը համաձայնություն է տվել ՀՀ կառավարության և ՄԱԿ-ի պարենի և գյուղատնտեսության կազմակերպության միջև «Բանջարաբուծության և սերմնաբուծության համակարգերի զարգացում» տեխնիկական համագործակցության ծրագրի կնքման առաջարկությանը: Ակնկալվում է, որ ծրագիրը կնպաստի Հայաստանի գյուղատնտեսության զարգացմանը` ստեղծելով բանջարեղենի սերմերի արտադրության բարելավման և արդիականացման կայուն հիմք:
Կառավարությունը վերաբաշխում է կատարել 2013թ. պետբյուջեում, փոփոխություններ և լրացումներ` իր ավելի վաղ ընդունած որոշման ցուցանիշներում, ինչը պայմանավորված է ՀՀ բնապահպանության նախարարության գծով Գերմանիայի Դաշնային Հանրապետության կողմից KfW միջազգային զարգացման բանկի միջոցով ֆինանսավորվող Հայաստանի «Արփի լիճ» ազգային պարկի ստեղծում» ծրագրի գործողությունների իրականացման ժամկետը մինչև 2014թ. ավարտը երկարաձգելու անհրաժեշտությամբ: Վերաբաշխումը և փոփոխություններն ու լրացումները կատարվել են ըստ ընդունված կարգի դրամաշնորհային ծրագիրը ՀՀ պետբյուջե ներառելու նպատակով:

Այլ հարցեր

Կառավարությունն ընդունել է երկրի 13 համայնքների ղեկավարների կամ ավագանու անդամների 2013թ. դեկտեմբերի 8-ի հերթական ընտրությունների նախապատրաստման և անցկացման ծախսերը ֆինանսավորելու որոշում:
Ի կատարումն ՀՀ նախագահի 2013թ. նոյեմբերի 21-ի հրամանագրի ՀՀ կառավարությունը ՀՀ պաշտպանության նախարարին պարտավորեցրել է 2013թ. դեկտեմբեր ամսին ապահովել ՀՀ զինված ուժերի պահեստազորի առաջին խմբի բժշկական կազմի` մինչև 35 տարեկան 54 բժիշկ-մասնագետ սպաների զորակոչը ՀՀ զինված ուժեր:
Կառավարության որոշմամբ մինչև ուսումնառության ավարտը` 2016թ. գարնանային զորակոչը պարտադիր զինվորական ծառայության զորակոչից տարկետում է տրվել Երևանի բնակիչ, Լոնդոնի համալսարանական քոլեջի սան Էմիլ Աբրահամյանին: Մեկ այլ երևանցի` Վահան Հովհաննիսյանը, ով այս տարի ավարտել է Շվեյցարիայի տեխնոլոգիայի դաշնային ինստիտուտի մագիստրատուրան և «Համակարգչային հետազոտություն» մասնագիտությամբ ընդունվել Լոնդոնի իմպերիալ քոլեջի ասպիրանտուրա, պարտադիր զինվորական ծառայության զորակոչից տարկետում է ստացել մինչև 2017թ. աշնանային զորակոչը: