երկուշաբթի, 26 հունիսի 2000
Այսօր վարչապետ Անդրանիկ Մարգարյանը հանդիպում է ունեցել հանրապետության մի շարք խոշոր գործարարների հետ, որոնք ներկայացրել են երկրում վարվող տնտեսական քաղաքականության նկատմամբ իրենց վերաբերմունքը, մտահոգությունները, տնտեսության զարգացման առաջնահերթ խնդիրները։ Մասնավորապես, գործարարներն առաջարկել են՝ վարչապետի անմիջական ղեկեվարությամբ ստեղծել նոր կառուցվածքային միավոր՝ դրա առջև դնելով տնտեսության զարգացման ռազմավարության մշակման խնդիրները։ Գործարարների կարծիքով այդ կառույցը պետք է ունենա պետական կարգավիճակ։
Ըստ գործարարների, անհրաժեշտ է ճշտել երկրում տարվող տնտեսական քաղաքականության ընդհանուր տրամաբանությունն այնպես, որ ծրագրի նպատակներն ու խնդիրները թելադրված լինեն երկրի զարգացման գերակայություններով ու արտահայտվեն մակրոտնտեսական որոշակի ցուցանիշների տեսքով:
Կարևորելով գործարարների հետ այս հանդիպումը, վարչապետը նշել է, որ պետություն-գործարարներ համագործակցությունը այսուհետ պետք է ավելի գործնական դարձնել և մշտապես միմյանց տրվող խոստումների, հավաստիացումների շրջանակներից դուրս գալ՝ աշխատելով «ավելի քիչ խոսել և ավելի շատ գործել» սկզբունքով: Անդրանիկ Մարգարյանը կառավարության համար առաջնահերթ է համարել ստվերայնության, հովանավորչության դեմ պայքարը, գործարարության համար մրցակցային հավասար, նպաստավոր պայմանների ստեղծումը, ինչը նաև օտարերկրյա ներդրողների, գործարարների համար երաշխիք կդառնա մեր երկրում գործունեություն ծավալելու հարցում: Վարչապետը նշել է, որ ՀՀ նախագահի, «Միասնություն» դաշինքի և կառավարության գործունեության ծրագրի հիմնադրույթներից բխող գործողությունների ծրագիրը մշակելիս անպայման հաշվի կառնվեն նաև գործարարների առաջարկները: Նա գործարարներին առաջարկել է առանձին խումբ ստեղծել տնտեսական օրենքների մշակման փուլում կառավարության հետ սերտորեն համագործակցելու և իրենց առաջարկները ներկայացնելու համար:
Վարչապետի հետ հանդիպմանը գործարարները հստակեցրել են համագործակցության առաջին քայլերը:
