ուրբաթ, 23 հունիսի 2000
Այսօր վարչապետ Անդրանիկ Մարգարյանի մոտ հրավիրված խորհրդակցությունում քննարկվեց «Լիցենզավորման մասին» ՀՀ օրենքի նախագիծը: Կար—որելով այս օրենքը, վարչապետը նշեց, որ այն նախևառաջ պետք է դիտարկել որպես տնտեսավարող սուբյեկտների գործունեության հեշտացմանը, հակակոռուպցիոն աշխատանքներին, անձանց իրավունքների պաշտպանությանը, պետության անվտանգության ապահովմանն ուղղված փաստաթուղթ: Այս ամենը բխում է կառավարության գործունեության և «Միասնություն» դաշինքի ծրագրերից: Կառավարությունը նպատակ է դրել պարզեցնել, թափանցիկ դարձնել լիցենզավորման ընթացակարգը, կրճատել տրման ժամկետները, լիցենզավորման ենթակա գործունեության տեսակները: Նախագծով սահմանվում է լիցենզավորման երեք տեսակ` չվերահսկվող, պարզ և բարդ ընթացակարգերով: Չվերահսկվող լիցենզավորման համար տրված է եռօրյա, բարդ ընթացակարգին` մեկամսյա ժամկետ: Լիցենզավորման ենթակա գործունեության պահանջների խախատման համար նախատեսվում են պատասխանատվության միասնական չափանիշներ և տեսակներ: Օրինազանցությունների դեպքում սահմանվում են գործունեության կասեցման և դատական կարգով լիցենզիայից զրկելու կարգերը:
Խորհրդակցությունում նպատակահարմար գտնվեց մինչև կառավարության քննարկմանը ներկայացնելը նախագիծը լրամշակել` հաշվի առնելով նախարարությունների նոր առաջարկները: Վարչապետը խորհրակցության մասնակիցներին կոչ արեց առաջարկները ներկայացնելիս առաջնորդվել ոչ թե նեղ գերատեսչական շահերով, այլ այն խնդիրներով, որ օրենքը կոչված է լուծել:
Նախարարություններին ու գերատեսչություններին հանձնարարվեց ներկայացնել այն օրենսդրական փաստաթղթերը, որոնք կպահանջվեն «Լիցենզավորման մասին ՀՀ օրենքի» ընդունումից հետո, դրանց հաստատման ժամանակացույցը, ինչպես նաև առաջնային ընդունվելիք նորմատիվային փաստաթղթերի ցուցակը:
