Հ. Ես թոշակառու եմ, բազմանդամ ընտանիք ենք, նպաստով ու թոշակով մի կերպ յոլա ենք գնում։ Նոր տարին մեզ ինչ կտա, թոշակների ու նպաստների բարձրացում սպասվո՞ւմ է, թե ոչ։
Ընտանեկան նպաստի համակարգում նպաստառու ընտանիքներին տրվող միջին ամսական նպաստի չափը կկազմի 23.6 հազ. դրամ` աճելով 12.0%-ով։ Երրորդ և ավելի երեխա ծնվելու կապակցությամբ` 2009թ. յուրաքանչյուր երեխայի համար միանվագ նպաստի չափը կկազմի 430 հազ. դրամ կամ 43.3%-ով ավելի, քան 2008թ.-ին։ Կենսաթոշակների գծով 2009թ. նախատեսվել է 181.8 մլրդ դրամ հատկացում,ինչը նախորդ տարվա համեմատ ավելի է 14.8%-ով։ Աշխատանքային կենսաթոշակի միջին ամսական չափը 2009 թվականին կկազմի 25.5 հազ. դրամ` աճելով մոտ 17.0%-ով։ Սպայական անձնակազմին և նրանց ընտանիքների անդամներին տրվող կենսաթոշակի միջին ամսական չափը 2009 թվականին կկազմի շուրջ 47.0 հազ. դրամ, իսկ շարքային անձնակազմին և նրանց ընտանիքների անդամներին տրվող միջին ամսական կենսաթոշակը` շուրջ 20.0 հազ. դրամ։
