Շաբաթ, 20 Դեկտեմբերի 2014
Հարգելի՛ պարոն Հակոբյան,
Հարգելի՛ գործընկերներ,
Ազգային անվտանգության համակարգի հարգելի՛ աշխատակիցներ,
Հարգելի՛ վետերաններ,
Հայաստանի Հանրապետության կառավարության և անձամբ իմ անունից ջերմորեն շնորհավորում եմ ձեզ մասնագիտական տոնի՝ Ազգային անվտանգության աշխատողի օրվա առթիվ:
Այս օրը միավորում է բոլոր նրանց, ովքեր ազգային անվտանգության մարմիններում ծառայությունը համարում են իրենց սրբազան պարտքը երկրի և ժողովրդի առջև: Ազգային անվտանգության ծառայությունը մեր պետականության անվտանգ գոյության ապահովման կարևորագույն կառույցներից է:
Հայաստանի Հանրապետության անկախության հռչակումից հետո վերաիմաստավորվեց նաև Ազգային անվտանգության ծառայության դերն ու ընկալումը հասարակության մեջ՝ ազգային անվտանգության ապահովմանն առնչվող խնդիրներից բացի, ներառելով նաև քաղաքացու սահմանադրորեն ամրագրված իրավունքների իրական պաշտպանի գործառույթը: Այն ազգային անվտանգության ապահովման ամենակարևոր տարրերից է, որը համահունչ է մեր երկրում իրականացված լայնածավալ ժողովրդավարական գործընթացներին: Ծառայության նկատմամբ հասարակության վերաբերմունքն ու վստահությունն արդյունավետ գործունեության լավագույն երաշխիքն են:
Գոհունակությամբ եմ նշում, որ Հայաստանի Ազգային անվտանգության ծառայությունն արդեն տարիներ շարունակ պատվով է իրականացնում իր առջև դրված խնդիրները՝ ժամանակին արձագանքելով ներքին և արտաքին սպառնալիքներին և աշխարհաքաղաքական արագ փոփոխվող իրավիճակների արդյունքում մեր երկրի առջև ծագող տարաբնույթ մարտահրավերներին: Վստահ եմ, որ ձեր կուտակած հարուստ փորձն ու մասնագիտական հմտությունները դուք կշարունակեք ծառայեցնել Հայաստանի Հանրապետության ազգային շահերի ապահովմանը, մեր պետականության հետագա ամրապնդմանն ու հզորացմանը:
Հայաստանի Հանրապետության կառավարությունը մշտապես իր ուշադրության կենտրոնում է պահում ազգային անվտանգության համակարգի աշխատակիցների սոցիալական խնդիրներին առնչվող հարցերը և հետևողականորեն շարունակելու է դրանց բարելավմանն ուղղված քաղաքականությունը:
Կրկին շնորհավորելով տոնի առթիվ՝ մաղթում եմ ձեզ և ձեր ընտանիքներին երջանկություն, բարեկեցություն և նորանոր հաջողություններ ձեր ազգանվեր գործունեության մեջ՝ հանուն մեր հայրենիքի անվտանգ գոյության:
