շաբաթ, 26 սեպտեմբերի 2009
Այսօր Հայաստանի Հանրապետության վարչապետ Տիգրան Սարգսյանն այցելել է Վ. Բրյուսովի անվան Երևանի պետական լեզվաբանական համալսարանի նոր մասնաշենքի բացման արարողությանը։ ՀՀ վարչապետը շրջել է նոր կառուցված մասնաշենքում, ծանոթացել է շենքային պայմաններին եղել է համակարգչային կենտրոնում և ընթերցասրահում։
Վարչապետը ներկաներին շնորհավորել է կրկնակի տոնի կապակցությամբ, քանզի այսօր նշվում է նաև Լեզուների եվրոպական օրը, ինչն անմիջական կապ ունի համալսարանի առաքելության հետ։ Վարչապետը շեշտել է. «Ժամանակակից աշխարհի կարևորագույն հատկանիշներից մեկն այն է, որ այն արագ փոքրանում է, և շփումները ազգերի միջև դառնում են ավելի ինտենսիվ»։
Գործադիրի ղեկավարի համոզմամբ «արագ փոքրացող աշխարհում ազգերի միջև շփումները ենթադրում են, որ մենք պետք է ավելի մեծ ուշադրություն դարձնենք լեզուներին։ ժամանակակից աշխարհը հնարավոր չէ պատկերացնել առանց օտար լեզուների իմացության»։
ՀՀ վարչապետը նշել է նաև, որ այսօր առաջ են գալիս ազգային ինքնության խնդիրները, քանզի ազգերի զարգացումը հանգեցնելու է նրան, որ փոքրաթիվ ազգերը հաջողության հասնելու համար պետք է բազմաթիվ լեզուներ սովորեն և միևնույն ժամանակ ամուր լինեն իրենց ինքնության մեջ։
Տիգրան Սարգսյանն ասել է, որ կառավարության կարևորագույն թիրախներից մեկը կրթությունն է քանզի 21-րդ դարը, կրթված, բանիմաց մարդկանց դար է լինելու։
