չորեքշաբթի, 26 մարտի 2008
Այսօր տեղի է ունեցել Սարդարապատի հերոսամարտի 90-ամյակի նշումը նախապատրաստող հոբելյանական հանձնաժողովի առաջին նիստը, որը վարել է հանձնաժողովի նախագահ, ՀՀ վարչապետ Սերժ Սարգսյանը: Նիստին մասնակցել են ՀՀ փոխվարչապետ, տարածքային կառավարման նախարարը, ՀՀ ֆինանսների և էկոնոմիկայի, պաշտպանության, կրթության և գիտության, մշակույթի, արտաքին գործերի նախարարները, ՀՀ կառավարության աշխատակազմի ղեկավար-նախարարը, ՀՀ գիտությունների ազգային ակադեմիայի պրեզիդենտը, Երևանի պետական համալսարանի, ՀՀ ԳԱԱ պատմության ինստիտուտի, Հանրային հեռուսառադիոընկերության խորհրդի ղեկավարները, Մայր Աթոռ Սուրբ Էջմիածնի դիվանապետը, Սարդարապատի հուշահամալիր- թանգարանի տնօրենը:
Նիստի սկզբում Սերժ Սարգսյանը նշել է, որ ընթացիկ տարում նախատեսվում է պետականորեն և մեծ շուքով նշել չորս հոբելյան` Սարդարապատի հերոսամարտի 90-ամյակը, Վիլյամ Սարոյանի, Վազգեն Ա. Ամենայն Հայոց Կաթողիկոսի և Վիկտոր Համբարձումյանի 100-ամյակները: Վարչապետը կարևորել է այդ բոլոր հոբելյանական միջոցառումների պատշաճորեն նախապատրաստումն ու անցկացումը, ընդգծելով, որ դրանք պետք է լինեն ոչ թե սոսկ այս կամ այն հոբելյանի օրը նշվող միջոցառում, այլ միջոցառումների մեծ շարան, որոնք առիթ կդառնան գնահատելու ինչպես Սարդարապատի հերոսամարտի, այնպես էլ հիշյալ մեծ անհատների դերն ու նշանակությունը մեր պատմության մեջ և ժողովրդի կյանքում:
Այնուհետև հանձնաժողովի քննարկմանն է ներկայացվել Սարդարապատի հերոսամարտի 90-ամյակին նվիրված միջոցառումների ծրագրի նախագիծը: Այն ներառում է չորս ենթաբաժին` 1) մշակութային, կրթական, գիտական, մարզական, զանգվածային, քարոզչական, 2) հրատարակչական, 3) հուշանվերային և այլ արտադրանքի թողարկման, 4) Սարդարապատի հուշահամալիր-թանգարանի բարեկարգման, նորոգման, շինարարական աշխատանքների մի քանի տասնյակ միջոցառումներով, որոնք, մշակված ժամանակացույցի համաձայն, մինչև տարեվերջ կիրականացվեն Երևանում, ՀՀ մարզերում և սփյուռքի համայնքներում:
ՀՀ վարչապետ Սերժ Սարգսյանը հանձնարարել է ևս մեկ անգամ քննարկել միջոցառումների ծրագրի նախագիծը` նկատի առնելով նիստում հնչած առաջարկությունները և 10-օրյա ժամկետում վերջնական տեսքով ներկայացնել հանձնաժողովին` լուրջ ուշադրություն դարձնելով միջոցառումների անցկացման համար նախատեսված ֆինանսական միջոցների արդյունավետ ծախսմանը:
