չորեքշաբթի, 26 մարտի 2008
ՀՀ նորընտիր նախագահ, վարչապետ Սերժ Սարգսյանն այսօր ընդունել է Հայաստանում Վիետնամի Սոցիալիստական Հանրապետության նորանշանակ դեսպան Բույ Դին Զինին:
Վարչապետը շնորհավորել է դեսպանին` պաշտոնը ստանձնելու կապակցությամբ և հաջողություն մաղթել նրան` մեր երկրում դիվանագիտական առաքելությունն իրականացնելու գործում: Սերժ Սարգսյանը նաև շնորհակալություն է հայտնել` ՀՀ նախագահի պաշտոնում ընտրվելու առիթով Վիետնամի նախագահ Նգուեն Մին Չիետի հղած շնորհավորանքի ու բարեմաղթանքների համար: Հանդիպման ժամանակ զրուցակիցներն արտահայտվել են երկու երկրների միջև քաղաքական ամուր կապերը տնտեսական փոխշահավետ համագործակցությամբ ավելի ամրապնդելու և խորացնելու օգտին. «Մենք շատ մեծ նշանակություն ենք տալիս Հարավ-արևելյան երկրների հետ համագործակցությանը և հուսով եմ, որ Ձեր նշանակումով, հայ-վիետնամական հարաբերություններն ավելի կամրապնդվեն», -դեսպան Բույ Դին Զինի հետ հանդիպմանն ասել է Սերժ Սարգսյանը:
Վիետնամի դեսպանը ՀՀ վարչապետին ներկայացրել է իր երկրի վերջին տարիների տնտեսական զարգացման դինամիկան, նշելով, որ քաղաքական կայուն իրավիճակում Վիետնամը վստահորեն զարգացնում է տնտեսությունը, և այսօր` ինչպես զբոսաշրջության, այնպես էլ օտարերկրյա ներդրումների համար այն ապահով ու հուսալի երկիր է:
Հայաստանի և Վիետնամի միջև տնտեսական կապերն ու ապրանքաշրջանառության ներկայիս ծավալները Սերժ Սարգսյանն ու Բույ Դին Զինը համարել են անբավարար և համոզվածություն հայտնել, որ ակտիվ ու շահագրգիռ աշխատելու դեպքում, կարելի է գտնել փոխադարձ տնտեսական շահեր և համագործակցության բազմաթիվ ոլորտներ` տնտեսական հարաբերությունները ևս քաղաքականի մակարդակին բարձրացնելու նպատակով:
Հանդիպման ավարտին Վիետնամի դեսպանը մեկ անգամ ևս իր երկրի իշխանությունների և ժողովրդի կողմից շնորհավորել է Սերժ Սարգսյանին` ՀՀ նախագահ ընտրվելու կապակցությամբ և մաղթել հաջողություն:
