ուրբաթ, 12 հունիսի 2026
Փոխվարչապետ Մհեր Գրիգորյանը շնորհավորական ուղերձ է հղել Ռուսաստանի օրվա առթիվ
Փոխվարչապետ Մհեր Գրիգորյանը մասնակցել է Ռուսաստանի օրվա առթիվ կազմակերպված միջոցառմանը, որի ընթացքում հանդես է եկել շնորհավորական ուղերձով, որում մասնավորապես նշել է.
«Հայաստանի Հանրապետության Ազգային ժողովի հարգելի՛ նախագահ,
Ձերդ գերազանցություն, պարոն դեսպան,
Սիրելի՛ բարեկամներ, հարգելի՛ գործընկերներ, տիկնա՛յք և պարոնա՛յք,
Հայաստանի Հանրապետության կառավարության անունից և անձամբ իմ կողմից ընդունեք մեր անկեղծ շնորհավորանքները Ռուսաստանի օրվա կապակցությամբ։
Այս տոնը պետականության, ազգային միասնության և ժամանակակից Ռուսաստանի վստահ զարգացման խորհրդանիշն է։ Ռուսաստանի Դաշնությունը կարևոր տեղ է զբաղեցնում համաշխարհային քաղաքականության, տնտեսության և մշակույթի մեջ, իսկ նրա ձեռքբերումները վկայում են բազմազգ ժողովրդի ստեղծարար աշխատանքի և տաղանդի մասին։
Հայաստանին և Ռուսաստանին կապում են դարավոր պատմական հարաբերություններ, որոնք հիմնված են փոխադարձ հարգանքի, ամուր բարեկամության և մեր ժողովուրդների միջև սերտ հումանիտար կապերի վրա։Մենք բարձր ենք գնահատում մեր համագործակցության պատմությունը և համոզված ենք, որ երկկողմ փոխգործակցության հետագա զարգացումը բխում է երկու երկրների շահերից և նպաստում է տարածաշրջանում կայունության և բարեկեցության ամրապնդմանը։ Մեր համագործակցության կուտակված փորձը երկարաժամկետ, հիմնարար և արժեքավոր ակտիվ է, որն անհրաժեշտ է պահպանել միջազգային հարաբերությունների յուրաքանչյուր կոնֆիգուրացիայի դեպքում:
Այս նշանակալի օրը մաղթում ենք Ռուսաստանի Դաշնությանը խաղաղություն, բարգավաճում և հաջողություններ զարգացման ճանապարհին, իսկ Ռուսաստանի բոլոր քաղաքացիներին՝ երջանկություն, բարօրություն և վստահություն վաղվա օրվա հանդեպ։
Հույս ենք հայտնում, որ առկա հարցերն ու տարաձայնությունները կհաղթահարվեն բաց երկխոսության շնորհիվ, իսկ Հայաստանի Հանրապետության և Ռուսաստանի Դաշնության միջև հարաբերությունները հետագայում ևս կզարգանան փոխըմբռնման, փոխադարձ հարգանքի և բարիդրացիության ոգով՝ ի բարօրություն մեր պետությունների և ժողովուրդների։
Շնորհավոր Ռուսաստանի օրվա կապակցությամբ։
Շնորհակալություն ուշադրության համար»:
