հինգշաբթի, 23 հոկտեմբերի 2014
Արտեմ Ասատրյանը պարզաբանումներ է ներկայացրել սոցիալական նպաստների օրենսդրությունում նախատեսվող փոփոխությունների վերաբերյալ
ՀՀ աշխատանքի և սոցիալական հարցերի նախարար Արտեմ Ասատրյանը ՀՀ կառավարության մամուլի կենտրոնում կայացած ասուլիսում ներկայացրել է «Ժամանակավոր անաշխատունակության նպաստների մասին» և «Պետական նպաստների մասին» ՀՀ օրենքներում փոփոխություններ կատարելու անհրաժեշտությունն ու նպատակը:
Ըստ նախարարի`վերջին 4 տարիներին այս երկու ծրագրերի համար նախատեսված ծախսերը պետական բյուջեով ավելացել են շուրջ 3 անգամ:
«Մենք ուսումնասիրել են երեխաների ծնունդների քանակը, աշխատավարձերի բարձրացումը և հիվանդությունների ժամանակ բացակայությունների չափը և պարզել, որ այս գործոնների հետ կապված 3 անգամ աճ չկա»,- նշել է Ա.Ասատրյանը:
Ուսումնասիրությունների արդյունքում պարզվել է, որ նպաստառուների շուրջ 20 տոկոսն աշխատանքի է ընդունվել ծննդաբերությունից մեկ-երկու ամիս առաջ: Իսկ ժամանակավոր անաշխատունակության մասով արձանագրվել է հիվանդացության միջին տևողության աճ`եթե նախկինում միջին տևողությունը շուրջ 7 օր էր, ապա վերջին տարվա ընթացքում այն կազմել է 17 օր:
«Սա նշանակում է, որ մենք խնդիր ունենք անդրադառնալու այս ծրագրերի հասցեականությանը, արդյունավետությանը: Այս խնդիրները վերլուծելուց հետո ներկայացվել է առաջարկություն: Դրանք վերջնական լուծումներ չեն, դրանք օրենսդրական նախաձեռնության տեսքով առաջարկություններ են, որոնք մենք քննարկում ենք և պատրաստ ենք քննարկել մինչև ամբողջական, լիարժեք լուծումներ գտնելը»,- ասել է Ա.Ասատրյանը:
Նախարարը հայտնել է նաև, որ հարցի վերաբերյալ նախատեսված են խորհրդարանական լսումներ, որոնց արդյունքում ձևավորված վերջնական նախագիծն էլ կներկայացվի ԱԺ-ի քննարկմանը:
