հինգշաբթի, 9 հոկտեմբերի 2014
Ստեղծվում են ապրանքաշրջանառության փաստաթղթավորման բարենպաստ պայմաններ
ՀՀ կառավարությունն այսօրվա նիստում փոփոխելով և լրացնելով ավելի վաղ ընդունած իր երեք որոշումը, դրանք համապատասխանեցրել է «ՀԴՄ կիրառման մասին» ՀՀ օրենքում լրացումներ և փոփոխություն կատարելու մասին» օրենքի պահանջներին` ապահովելով տրանսպորտային միջոցներում ՀԴՄ միջոցով էլեկտրոնային եղանակով հաշվարկային փաստաթղթերի, հարկային հաշիվների դուրս գրման հնարավորությունը: Այս մասին կառավարության մամուլի կենտրոնում կայացած ասուլիսում նշել է ՀՀ ֆինանսների փոխնախարար Արմեն Ալավերդյանը:
Ըստ նրա` որոշումն ապահովում է ապրանքաշրջանառության փաստաթղթավորման բարենպաստ պայմաններ: «Երբ ապրանքներն առաքվում են մեծածախ նպատակներով, դուրս է գրվում հաշվարկային փաստաթուղթ: Այսպիսով, եթե տնտեսվարող սուբեկտն ապրանք է առաքում, հնարավորություն կունենա այդ մեքենաների վրա տեղադրել հսկիչ դրամարկղային մեքենա»,-նշել է Ա.Ալավերդյանը:
Փոխնախարարը անդրադարձել է նաև կառավարությանը հավանությանն արժանացած «Շրջանառության հարկի մասին» օրենքում փոփոխություններ և լրացումներ կատարելու մասին» օրենքում փոփոխություն կատարելու մասին» ՀՀ օրենքի նախագծին, որով առաջարկվում է երկարացնել օրենքի կիրառության անցումային դրույթների գործողության ժամկետը: ՓՄՁ շահերը ներկայացնող ՀԿ ներկայացուցիչների հետ քննարկման արդյունքում պարզվել է, որ պարտադիր փաստաթղթավորման պահանջի ներդրմամբ ի հայտ են եկել մի շարք տեխնիկական խնդիրներ: Դրանք պայմանավորված են ապրանքի գույքագրումը 10-օրյա ժամկետում ավարտելու օրենսդրական պահանջով, մասնավորապես, առևտրական գործունեությամբ զբաղվող հարկ վճարողները դժվարանում են հաշվառել իրենց ապրանքի մնացորդը և տեղեկություն ներկայացնել հարկային մարմին:
