երկուշաբթի, 20 մայիսի 2013
ՀՀ-ում նախատեսվում է ստեղծել IBM-ի նորարարական լուծումների և տեխնոլոգիաների կենտրոն
ՀՀ կառավարությունում ՀՀ էկոնոմիկայի նախարար Վահրամ Ավանեսյանը և IBM ընկերության փոխնախագահ Կիրիլ Կորնիլևն այսօր ստորագրել են Փոխըմբռնման հուշագիր՝ երկարաժամկետ համագործակցության հնարավորություններն ու տարբերակներն ուսումնասիրելու նպատակով: Նշենք, որ IBM-ի հետ համագործակցության նախնական պայմանավորվածությունը ձեռք է բերվել անցյալ տարի ՀՀ վարչապետ Տիգրան Սարգսյանի՝ ԱՄՆ կատարած այցի ժամանակ:
ՀՀ կառավարության մամուլի կենտրոնում կայացած ասուլիսում Վ. Ավանեսյանն ասել է, որ հուշագիրը կարևոր է ՀՀ-ում տեղեկատվական տեխնոլոգիաների զարգացման համար: Ողջունելով IBM-ի մուտքը Հայաստանի Հանրապետություն` նախարարը նշել է, որ ՏՏ ոլորտը մեր երկրի գերակա ուղղություններից է հանդիսանում: Ըստ Վ.Ավանեսյանի` համագործակցությունը շարունակվելու է 3 ուղղություններով՝ կրթություն, գիտություն և բիզնես:
Կ. Կորնիլևի կարծիքով` նման համագործակցությունը նոր թափ կհաղորդի նաև Հայաստանում տեղեկատվական տեխնոլոգիաների զարգացմանը: «Տեղեկատվական տեխնոլոգիաների ոլորտը, ինչպես ամբողջ աշխարհում, այնպես էլ Հայաստանում, հանդիսանում է տնտեսության կարևորագույն ճյուղերից մեկը»,-ասել է IBM ընկերության փոխնախագահը:
Հուշագրի շրջանակում կողմերը մտադիր են մշակել համաձայնագիր՝ ՀՀ-ում IBM-ի նորարարական լուծումների և տեխնոլոգիաների կենտրոնի ստեղծման ուղղությամբ (Center for IBM Innovative Solutions and Technologies):
