Հայաստանի Հանրապետության Կառավարություն

Վարչապետ Հովիկ Աբրահամյանն այսօր Երևանի Ալեքսանդր Սպենդիարյանի անվան օպերայի և բալետի ազգային ակադեմիական թատրոնի դահլիճում մասնակցել է ՀՀ առևտրաարդյունաբերական պալատի ավանդական «Մերկուրի» մրցանակաբաշխությանը: «Մերկուրի» մրցանակաբաշխությունը Հայաստանում անցկացվում է 2006 թվականից:
Կառավարության ղեկավարը «Մերկուրի» մրցանակ է հանձնել 5 անվանակարգում լավագույնը ճանաչված ընկերությունների ղեկավարներին՝ «Հեռահաղորդակցության առաջատար օպերատոր Հայաստանում» անվանակարգում՝ «Վիվասել-ՄՏՍ» ընկերության գլխավոր տնօրեն Ռալֆ Յիրիկյանին, «Լավագույն վճարային համակարգ» անվանակարգում՝ «Telcell» ընկերության գլխավոր տնօրեն Արամ Ազատյանին, «Հայրենական լավագույն ապրանքանիշ» անվանակարգում՝ «Էլբատ» ընկերության նախագահ Սամվել Աբրահամյանին, «Ֆինանսաբանկային համակարգում տեղեկատվական տեխնոլոգիաների ներդրման բնագավառում առաջատար ընկերություն» անվանակարգում՝ «LSoft» ընկերության տնօրեն Լարիսա Լալայանին, «Ժողովրդական բանկ» անվանակարգում՝ «Յունիբանկ» ԲԲԸ վարչության անդամ, ֆինանսական տնօրեն Գոհար Գրիգորյանին:
Ընդհանուր առմամբ «Մերկուրի» մրցանակ է շնորհվել 25 անվանակարգում՝ տնտեսության տարբեր ոլորտներ ներկայացնող առաջատար ընկերություններին, պարգևներ բիզնեսին աջակցող կազմակերպություններին և անհատներին։ «Մերկուրի»–ն միջազգային մրցանակաբաշխություն է, այն կազմակերպում են աշխարհի բոլոր առևտրաարդյունաբերական պալատները։